Conclúe o proxecto divulgativo SyngDoc

Unha iniciativa liderada polo IIM e financiada por FECYT- MINECO e o propio CSIC

O Consello Superior de Investigacións Científicas concluíu o proxecto divulgativo “SyngDoc“, iniciativa do Instituto de Investigacións Mariñas a través do Grupo de Bioloxía e Fisioloxía Larvaria de Peixes coa colaboración da Fundación Española para a Ciencia e a Tecnoloxía (FECYT-MINECO; Convocatoria de Axudas para o Fomento da Cultura Científica, Tecnolóxica e da Innovación 2016) e a Axencia Estatal CSIC.

No proxecto tamén participaron o Instituto Mediterráneo de Estudos Avanzados (centro mixto CSIC -Universidade das Illas Baleares), as universidades de Santiago de Compostela (Grupo Acuigen) e A Coruña (Grupo BioCost) e científicos do Instituto Español de Oceanografía e de Gimnazija Kranj (Eslovenia).

O proxecto desenvolveuse fundamentalmente ao redor da produción dunha longametraxe documental (SyngDoc: O descoñecido mundo dos signátidos), que se centra nos Signátidos, unha singular familia de peixes moi vulnerables á que pertencen os cabaliños de mar, os peixes pipa e os dragóns de mar. O proxecto conta coa canle SyngDoc en Youtube e con espazos en redes sociais. Todas estas accións tiveron como obxectivo explicar ao público non especializado a bioloxía, ecoloxía, evolución e conservación das especies de Signátidos e dos seus hábitats, especialmente das pradarías mariñas, xunto co desenvolvemento de técnicas de cría en catividade.

A longametraxe estivo patrocinado polo Museo do Mar de Galicia, Fundación Zoo de Barcelona, Getxo Aquarium, Mergullo Illas Cíes, Aquagest Xixón e Disetecmar S.L. e contou coa colaboración da Xunta de Galicia.

Segundo o responsable do proxecto, Miquel Planas, científico do CSIC no IIM, os resultados alcanzados “foron moi superiores ao esperado, cunha participación cidadá moi alta que xa deu alcanzace até máis de 60 países”.

O documental

Foi galardoado co II Premio na categoría de documentais de longa duración no Ciclo Internacional de Cinema Submarino de Donostia – San Sebastián CIMASUB 2017.
De 45 minutos de duración, foi realizado pola produtora viguesa Inxenia Audiovisual e conta con gravacións realizadas en Galicia, Illas Baleares, Australia e Eslovenia (fósiles). Está dispoñible en Youtube en tres idiomas (castelán, galego e inglés), contando tamén con subtítulos e adaptación especial para discapacitados. Achega unha visión xeral de alto contido didáctico sobre os Signátidos e a problemática da súa vulnerabilidade e sobre as investigacións que ao redor destes peixes están a desenvolverse no Grupo de Bioloxía e Fisioloxía Larvaria de Peixes do IIM.

En total, desde a súa presentación oficial o 15 de novembro de 2017 proxectouse en máis de 20 eventos, entre os que figuran o Ciclo Internacional de Cinema Submarino de Donostia – San Sebastián 2017 e a XXVII Semana de Cinema Submarino Universidade de Vigo.

Foi obxecto de difusión en cadeas de televisión e portais: Televisión de Galicia, Canle Castela A Mancha, V Televisión, Correo TV, GCiencia.com, Indagando TV, Canle Rías Baixas, Ciencia TK, Grupo É, Galicia Confidencial, Faro de Vigo…
Proximamente presentarase á XXXI convocatoria de Premios Prismas Casa das Ciencias á Divulgación (Museos Científicos Coruñeses, Concello da Coruña), na modalidade vídeo.

Outras accións do proxecto

O 4 de maio de 2017 abriuse a páxina en Facebook, que na actualidade conta con 200 seguidores, e o 24 de maio lanzouse a páxina do proxecto en Twitter, que na actualidade conta con preto de 100 seguidores. O 12 de xuño de 2017 lanzouse ao público o blogue dedicado ao proxecto. O 25 de agosto de 2017 abriuse a canle SyngDoc en Youtube, no que se foron incorporando os diversos materiais audiovisuais producidos, que ascenderon a un total de once.

“A dispoñibilidade destas plataformas en Internet permitiu atraer a atención de moitos cidadáns distribuídos en máis de 60 países, cunha audiencia e unha participación total que supera os dous millóns, considerando actos presenciais ou virtuais e difusión en medios de comunicación”, destaca Miquel Planas.

“Ademais, realizáronse seis magníficas ilustracións científicas en tamaño DIN A3 por parte da ilustradora viguesa Clara Cerviño. Para iso utilizáronse 6 das especies de signátidos máis representativas do noso litoral: Hippocampus guttulatus, Hippocampus hippocampus, Syngnathus acus, Syngnathus typhle, Entelurus aequoreus e Nerophis lumbriciformis. A partir destas ilustracións producíronse cartóns postais didácticas. Tanto as ilustracións como os esbozos foron motivo de diversas exposicións, xa sexa de maneira independente ou ben asociadas a actividades relacionadas coa proxección do documental“, explica Miquel Planas.

Todos os materiais producidos son de acceso público e uso gratuíto (excepto para fins comerciais), estando dispoñibles nas plataformas propias do proxecto SyngDoc. Os materiais audiovisuais en calidade 4K poden obterse previa solicitude (syngdoc@gmail.com).

“Unha vez finalizado o proxecto, o obxectivo é seguir fomentando a súa difusión a través dos medios xa postos en marcha, participar en máis festivais de cinema relacionados co mundo submarino e de conservación da biodiversidade e facilitar a utilización dos materiais producidos á comunidade educativa”, conclúe Miquel Planas.

Para saber máis sobre este proxecto poñer no buscador SyngDoc en Cíes.gal ou premer AQUÍ.

Author: Cíes.gal

Redacción Cíes.gal.