Vista parcial do lugar do “Almacén ” en Sálvora” a través dunha extraordinaria imaxe de Fernando Rey Daluz
A escultura da serea reconvertida en lenda, a vella taberna reconvertida en capela e a factoría-almacén de salgado de peixe reconvertida en pazo. Bolos graníticos, liques alaranxados e matogueira costeira. Tamén hai un areal, duna, augas turquesas con fondos de area, rochosos e bosques de algas, onde existe unha extraordinaria riqueza de vida. Sorprende unha plantación de eucaliptos, un elemento discordante. Ao fin, ese era un espazo ocupado pola matogueira e terras de labranza reconvertidas en cultivo forestal. Reconversións e cambios de carácter antrópico que foron quenes de ir transformando a paisaxe natural e cultural das illas do Parque Nacional. Esta imaxe forma parte dese resultado.
Así, esta instantánea e vista parcial de Sálvora, aparentemente demasiado “típica” ou “clásica”, é sen embargo a través desta captura, quen de reflictir e aglutinar moitos dos aspectos do rico patrimonio que alberga o arquipélago de Sálvora. Multitude de recursos e valores por descubrir ao noso alcance.
Premer sobre a imaxe para a poder ampliar
Imaxe:
Author: Santiago Boado Aguinaga
Santi Boado é licenciado en Historia pola Universidade de Santiago. Investigador, divulgador e redactor. Naturalista vocacional, ten formación en comercialización e información turística, interpretación do patrimonio e educación ambiental. Exerce de guía-intérprete en espazos con valor patrimonial. Tamén é guía acreditado do Parque Nacional marítimo terrestre das Illas Atlánticas de Galicia e membro da Asociación de Guías Acreditados das Illas Atlánticas de Galicia-Agaia, do clube de montaña Pena Trevinca-Montañeiros de Galicia e da Seo-Birdlife.
