Ons: unha illa habitada · Paula Ballesteros-Arias e Cristina Sánchez-Carretero
CAPÍTULO 4 (XXVI)
Os seus lugares
Lavadoiros de Canexol
Lavadoiro novo de Canexol
Lavadoiro situado no barrio de Canexol que aproveita as augas do rego do mesmo nome. Sitúase na marxe esquerda do antigo camiño que ía aos campos de labor en torno ao castro.
Segundo os datos tomados no traballo de campo etnográfico, este lavadoiro construíuse nos anos 70 onde antigamente había un hórreo.
O lavadoiro é de planta rectangular e está construído en ladrillo, cemento e formigón. A cuberta de placa é a dúas augas con tella do país e está sostido por tres columnas e unha parede en ángulo. Está parcialmente escavado na terra, e a auga entra pola parede oeste e a sobrante sae pola leste, a unha pía feita en cemento. Na parede exterior orientada ao sur hai un mural do fondo do mar que foi pintado en 1997 polos rapaces e rapazas do campo de traballo que había na illa. Hoxe é un campamento xuvenil.
A pedra de lavar ten forma de “L” e está feita en cemento. Destaca o raiado en sentido horizontal para facilitar o lavado da roupa así como os ocos para deixar o xabrón das lavandeiras.
Lavadoiro novo do barrio de Canexol en Ons © CSIC
Lavadoiro vello de Canexol
Lavadoiro feito na década dos 50, que aproveita as augas do rego de Canexol. Sitúase ao marxe dereito do antigo camiño que ía aos campos de labor da contorna do castro.
Este lavadoiro de orientación norte – sur está escavado na terra, é de planta rectangular e está construído en ladrillo, cemento e formigón.
A cuberta de placa e a dúas augas sen recubrimento de tella. Está pechado por tres paredes, quedando o acceso libre pola parede leste. No interior deste recinto está o lavadoiro propiamente dito e a pedra de lavar de planta rectangular e en forma de “U” de base plana.
Destaca no exterior, no frontón do teito, feito en cemento, o relevo do xugo e das frechas, símbolo da ditadura franquista.
Por unha serie de razóns este lavadoiro deixou de usarse construíndose un novo nos anos 70, a escasa distancia deste.
Lavadoiro vello barrio de Canexol en Ons © Gustavo Cochón
Se dispón de conexión a internet, recomendámoslle que consulte o vídeo “Ons: mar, terra e identidade” a través desta ligazón
Título: Ons: unha illa habitada
Autor: Ballesteros-Arias, Paula ; Sánchez-Carretero, Cristina
Dispoñibilidade: Descarga gratuita en Apple
Ler tamén: Ons: unha illa habitada
Author: Cíes.gal
Redacción Cíes.gal.
