Estrea en Vigo da obra de teatro científico “Marea invisible”

Portada » O Parque Nacional » Estrea en Vigo da obra de teatro científico “Marea invisible”

Xuñ 12, 2017 | ACTUALIDADE

Estrea en Vigo da obra de teatro científico “Marea invisible”

Unha niciativa do CSIC e da Escola Municipal de Teatro de Vigo

Mañá, martes 13 de xuño, estréase a obra de teatro científico “Marea invisible“, iniciativa que nace da colaboración entre o Servizo de Educación do concello de Vigo, a través da Escola Municipal de Teatro, e o Consello Superior de Investigacións Científicas.

O proxecto, coordinado desde a Unidade de Cultura Científica do CSIC en Galicia, conta co asesoramento científico de persoal do Instituto de Investigacións Mariñas: Pilar Riobó, do grupo de Fitoplancto Tóxico, e José Manuel Fernández Babarro, do grupo de Ecofisioloxía, Biomarcadores e Xestión Sustentable de Bivalvos.

O proceso creativo iniciouse en febreiro cunha sesión teórica que incluíu a visita do alumnado e os docentes ás instalacións do IIM. Ao longo destes meses leváronse a cabo varias reunións entre os docentes da escola e o persoal do CSIC para supervisar os contidos científicos da peza e definir os personaxes e os decorados relacionados coa investigación.

A obra ten unha duración estimada dunha hora e cuarto e está recomendada para maiores de 10 anos. O obxectivo da peza é espertar a curiosidade do público sobre a ciencia mariña, fomentando a reflexión sobre o consumo de moluscos e os efectos das toxinas das microalgas mariñas na saúde humana.

Esta representación forma parte das Xornadas Teatrais 2017, evento que se desenvolve en Vigo desde o 8 de xuño e durante o cal o alumnado da Escola Municipal de Teatro representa as creacións artísticas que desenvolveron durante este curso escolar.

Marea invisible” únese a outras accións relacionadas co teatro científico que se levaron a cabo desde a UCC do CSIC en Galicia como o Curso Monográfico de Teatro Científico organizado desde a Escola Municipal de Teatro de Vigo e que tivo lugar o verán pasado, ou as representacións da obra “Que traballo tan curioso!” no marco do proxecto Cidade Ciencia, que seguen percorrendo localidades de toda España.

Premer sobre a imaxe para mirar a programación:

Imaxe destacada: © Suso Framil

Cíes.gal
Author: Cíes.gal

Redacción Cíes.gal.

Otros artículos